Assalamu’alaikum
Wr. Wr
Bapak kepala
sekolah ingkang dahat kula kurmati, Bapak/Ibu Guru ingkang dahat kinurmatan.
Rencang saha adik-adik ingkang kula tresnani.
Puja-puji
syukur dhumateng gusti ingkang Maha Agung, ingkang sampun angluberaken rahmat
sarta hidayah. Dene kula panjenengan sami saged makempal wonten ing wisma SMP N
1 Wates, kangge ngawontenaken perpisahan.
Bapak/Ibu Guru
ingkang dahat kinurmatan. Boten kantun kula minangka wakilipun putra-putri
siswa kelas tiga. Ngaturaken agunging panuwun ingkang tanpa upami awit
keikhlasan saha sih katresnan Bapak/Ibu Guru anggenipun nggulawenthah dhumateng
para siswa. Saengga saged ngrampungaken kewajiban ingkang sampun kalampahan
sadangunipun 3 tahun, kanthi pikantuk Serat Tandha Tamat Belajar.
Bapak/Ibu Guru
tuwin adik-adik ingkang satuhu kula kurmati saha kula tresnani. Sakedhap malih
kula sarencang ninggalaken pawiyatan punika. Awrat anggen kula matur kados
pundi raosipun nilar Bapak/Ibu Guru saha adik-adik. Jaragan kawontenan kedah
mekaten, pramila kapeksa kula kaliyan rencang-rencang nilaraken Bapak/Ibu Guru
saha adik-adik kelas setunggal tuwin kelas kalih. Sanadyan ta sampun pepisahan
ingkang ateges tinebih ing netra, mawantu-wantu kula tansah nyenyuwun supados
taksih celak ing panggalih.
Kula sarencang
kelas tiga ingkang badhe nilaraken pawiyatan punika tansah nyenyuwun lan
ndedonga adik-adik sageda kasil anggenipun ngangsu kawruh wonten ing pawiyatan
punika. Kula minangka wakilipun rencang kelas tiga, tansah nyuwun gungan,
mugi-mugi adik-adik sregep anggenipun sinau lan tansah ngaosi dhumateng
Bapak/Ibu Guru.
Boten kantun
ugi kula dalah rencang kelas tiga tansah memuji dhumateng Gusti ingkang Maha
Agung, supados Bapak/Ibu guru saha adik-adik pikantuk rohmating pangeran
wilujeng mboten wonten alangan satunggal punapa.
Kula
kinten boten prayogi menawi atur pamitan punika kula pepanjang. Kula namung
tansah tambahing donga pangestu saking Bapak/Ibu Guru saha adik-adik. Sageda
wilujeng sasampunipun medal saking pawiyatan punika lan sageda pikantuk
pawiyatan luhur kangge ngangsu kawruh ngilmu ingkang langkung inggil. Ingkang
boten nglajenaken sageda pikantuk pedamelan ingkang samurwat kaliyan
pangartosan ingkang sampun tinampi.
Bok
menawi wonten kirang tatakrami anggen kula matur saha sisip sembiring atur,
kula minangka wakil kelas tiga tansah nyuwun agunging panuwun ingkang tanpa
upami.
Wassalamu’alaikum
Wr. Wb
Nuwun.
0 komentar:
Posting Komentar